كتبت/ رندة صباحى
وجهت الفنانة يسرا رسالة لـ محمد صلاح نجم منتخب مصر وليفربول، حرصت من خلالها على أن تدعمه في خطوته المقبلة بعد وداعه لـ ليفربول، مؤكدة أن النجاح الأسطوري الذي حققه لم يؤثر على خُلقه وسلوكه، وأن صلاح سيبدأ رحلة جديدة بنجاحٍ جديد، فمثله لن يتنازل عن النجاح والتميز دائمًا.
يسرا لـ محمد صلاح: النجاح مغيرش أصلك
وكتبت يسرا رسالة عبر حسابها الشخصي بـ فيس بوك، قائلةً: بعيدًا عن كل النجاحات والأرقام والإنجازات اللي العالم كله شايفها، أنا حابة أقول لك إن أكثر شيء مميز فيك هو شخصك الطيب الجميل.. إنك فريد واستثنائي فعلًا، بموهبة كبيرة، لكن بقلب أكبر، وبحضور يخلي أي حد يعرفك يفتخر بيك أكتر.
وأردفت يسرا: رحلتك مع ليفربول كانت رحلة عظيمة بكل معنى الكلمة، مش بس لأنك صنعت فيها تاريخ، لكن لأنك كنت دايمًا مثال يُحتذى به في الالتزام والاحترام، وفي إن النجاح الحقيقي عمره ما غيّر في أصلك ولا في تواضعك.
وأضافت يسرا: أنت مش بس مصدر فخر لمصر، أنت واحد من رموزها اللي بنعتز بيهم بجد… وكل خطوة نجحت فيها كانت فرحة لناس كتير، وأنا واحدة منهم، ببارك لك على انتهاء فصل مهم واستثنائي من رحلتك، ومتأكدة إن اللي جاي هيكون أجمل وأكبر، لأن الناس اللي زيك ما بتقفش عند محطة… هي دايمًا بتكمل وتبهر.. ربنا يوفقك في كل خطوة جاية، ويفضل نجاحك دايمًا على قد تعبك وقلبك الجميل.
